ភ្នំពេញ៖ ក្រោយការទទួលមរណភាពគួរឱ្យសោកស្តាយរបស់លោកយាយ ទេវនាដនិម្មិត ឯម ធាយ កាលពីពេលថ្មីៗ នៅព្រឹកថ្ងៃសុក្រនេះ កម្ពុជាបានបាត់បង់ធនធានផ្នែកសិល្បៈបុរាណមួយរូបទៀតហើយ គឺលោកព្រឹទ្ធាចារ្យអាយ៉ៃជើងចាស់ដែល មហាជនខ្មែរច្រើនលើសលុបបានស្គាល់ និងហៅថា តា សាឡាត់ បានទទួលមរណភាពក្នុងជន្មាយុ៨០ឆ្នាំ ដោយសាររោគាពាធ (ជំងឺសួត និងលើសឈាម) ។
បើតាមព្រះតេជគុណ សូ សៀង តាសាឡាត់ ដែលមានឈ្មោះពិត ម៉ក់ កាណេន បានទទួលមរណភាពនៅម៉ោង ៩និង៣០នាទីព្រឹកថ្ងៃសុក្រនេះ។ ព្រះតេជគុណ សូ សៀង បានបន្ថែមទៀតថា តាសាឡាត់ ត្រូវបានបញ្ជូនទៅមន្ទីរពេទ្យដើម្បីព្យាបាល ប៉ុន្តែដោយសារស្ថានភាពធ្ងន់ធ្ងរគាត់ត្រូវប្រើអុកស៊ីសែន ប៉ុន្តែបានទទួលមរណៈភាពទៅនៅព្រឹកនេះ។ សពរបស់លោកត្រូវបានយកមករក្សាទុកនៅខណ្ឌសែនសុខ ដើម្បីធ្វើពិធីបូជាសពតាមប្រពៃណី។
គួរជម្រាបថា ស្ទើរពេញមួយជីវិតទៅហើយ ព្រឹទ្ធាចារ្យសាឡាត់ ប្រើប្រាស់ជំនាញសិល្បៈបុរាណអាយ៉ៃ ដើម្បីបម្រើអារម្មណ៍មហាជនខ្មែរប្រុសស្រី។ លោកបានបំរេីវិស័យសិល្បៈតាំងពីវ័យ២៦ឆ្នាំ ជាអ្នកចម្រៀងអាយ៉ៃល្បីឈ្មោះតាំងពីសម័យសង្គមរាស្រ្តនិយម រហូតមកដល់បច្ចុប្បន្ន។ កេរ្តិ៍ឈ្មោះជាសិល្បករ អាយ៉ៃរបស់លោក បានល្បីសុះសាយ មានការទទួលស្គាល់ពីមហាជនខ្មែរគ្រប់រូប និងត្រូវបានអ្នកជំនាន់ក្រោយត្រង់ត្រាប់តាម សម្រាប់ជំនាញផ្នែកអាយ៉ៃរបស់លោកផងដែរ៕
គេហទំព័រ E-Arts សូមចូលរួមរំលែកទុក្ខយ៉ាងក្រៀមក្រំចំពោះមរណទុក្ខនេះ និងសូមបួងសួងឱ្យវិញ្ញាណក្ខ័ន្ធវីរសិល្បករ ម៉ក់ កាណេន ហៅលោកតា សាឡាត់ បានឈានដល់សុខគតិភពកុំបីខាន៕
រូបភាព៖ Sabay